Anak Badeng Lg. Busang Pertama Mengenal Sekolah

Gambar ji pelua' kise' kelup de' ading tai tisen un sekolah me' lepo' ilu cen Long Busang. Ida tai sekolah ke' Long Jawe'. Gambar ji oban mubaligh ala' oman 1972 re ka' Lg. Jawe', dalau re lidik lasan oma' dado'. Nta le tisen eh e' kelonan di. Tapi setelah 36 oman ilu lepa un sangkit ale' nai maju cen udip sakai le. Naki ilu un tai alo' se' cen oo du dari segi kemajuan. Ilu naki un meli amin batu ke' pasen, kado' de' gayeng perintah, un kereta, motorsikal ngan un pe de' un syarikat & Kompeni tengen.

Kejaie

Gaban ji bada' se' gaya' tading udip lepo' ilu tai paliu ka' Lg. Dungan. Ji se' Badeng Lg. Dungan kejaie kenta' oma' Ato' Ukong oman 1984. Lepa sebayang ji, ida kejaie ngan nta ne ida tai kerja tego' tau bio' (Minggu).

Konvokesyen Tadika 2 Raul Rens

Tading Bolan ca, oman 2007, Raul Rens Reniu un tai sekolah tadika 1 ngan du ka' Tadika Chung Hua, Sibu. Tading e tai un nangeh, bimpin, saeh ngan ba-an ale. Tai 2-3 tau e sekolah, ja ne tai e malai, un toyang ngan mencam pita toyang ngan piat.












Sio' tanggal 13 November ji, Raul Rens Reniu pelepa sekolah Tadika 2 e ka' Tadika Chung Hua, Sibu. Un dua oman ne mateng sekolah tadika kaie. Setakat ji, ia un mencam baca bahasa malaysia, mencam baca tulisan kina', ngan mencam ti matematik peringkat asas(tambah,tolak ngan bahagi).
























Gaban oban ketai re ti persembahan sempena hari Konvokesyen re pat. Un ramei ale' pe se' Cikgu re ngkin ida. Un je' cana-an seh de' ia re pisu kina' mung. Nta teka' le mencam ngening dau re ne.

Perubahan Gereja Kakus 1998 - 2008

Perubahan Gereja Kakus 1998 - 2008 (10 tahun)

Kaban ji pelua' kise' Amin Palan Allah Data Kakus oman 1998. Kenyah Badeng long Dungan nai ke' apau Burok lepe ngadan ne dalau ja re. Dalau ji nta lepe un amin Gembala temping Gereja ka. Tai lepo' ilu Maju oja ja ja ne ilu nak ngadan lepo' le Data Kakus. Gereja puun ji bada' du lepa ngebio' e. Tading du oyan ne 1985 re, ia un iut. Ikem naat se' sengau e ja' pute' se' ja. Ja bio' e tading du oyan ne. Kaban ji bada' ca liwai du lepa ngebio' e oman 1998.

Ji se' bada' gambar Gereja data Kakus bolan pien oman 2008 tidai re. Gambar ji kenangan paling ngebaya' cen kena dau lepo' kelo' ke ngebio ngan ngemading Gereja ilu ji la-a. Un dau re bada' pelan gereja ji, ia ke piwa' sile' kusun dau pentas e. Berang e un tai bio' pa sokat ida oyan.

Gereja beh te' janan tai ka' Padang Bola

Pandangan Depan

Amin Gembala

Nta le tisen kumin dau arkitek gereja Apau ke design beh te' dalem ngan kumin se' cara e ke ngelinget tiang -tiang beh te' dalem Gereja oo. Jadi kua'-kua' ne ilu mepo nak belanja apan kado' ida sokat oyan kidi oo. Ilu harap ia nta pana uko' baen teka naki ne. Atau ilu sokat nak air-conditioner kidi pa kado' oo lah. Harap Tuhan memberkati ilu mung. Tega Tawai.

Masat Nai Sekolah Cen Kakus

Kaban ji oban ilu ala' dalau pengudip Badeng tai masat cen Data Kakus tai ka' Long Dungan 1988. Masa ji, tai anak Badeng sekolah ka Sekolah Menengah Belaga ngan ka' SRK Airport, Belaga. Nta lepe du oyan sekolah me ilu Badeng ka' Kakus dalau ja.
Anak Badeng un bak ba-a cen Kakus belanja re ke' sekolah. Un abe' telu-pat gateng palai ngkin loh kelo' ke kado' sin. Un se' anak leto di, de' to-a nai matet ngan ngkin ba-a belanja me ida. Kelesau ale' se' tepat Badeng di dalau ja re.
Un dau palai koma dau, kala' ke boet sekompet kise' leto Apau dau du. Oban re tai boet oban bak ba-a, nyara nak janan ja singket bolan nai pita sekolah.