Kanjet Solo

Kanjet solo jane ca Tradisi ilu Kenyah cen bekading ale' re. Tading le Kenyah petat buau ngan Impan, Kelabit,Saben, Penan, Punan ngan suku de' ca, memang Kanjet ji lepa jadi Tradisi le mung. Juko' abe' naki ne ilu Bangsa Dayak ke' Sarawak ji un persamaan keriut se' layan Kanjet le. Dalau udip tepun le ale' pepatai ala' ulu sena-a', Kanjet pe ida ngeramei oban sokat ala' ulu kado' man re malan me lepo'. Juko' du koma ida di ne laki makang atau laki ayau lepo' sena-a'.

Dalau lepo' le ngeramei laa kanjet pe ida. Layan kise' re kanjet jane, kua' gaya' kise' du ke pepatai. Masa' pe ida kanjet keja kua' kise' cara du nyubuk pepatai, ngala, ngan bada' kise' penguat osa re tain? nta pe ilu tisen. Juko' le koma dau asal kanjet lasan ja jane memang lepa ujud dalau le pemung tepun cen Impan, Kayan, Penan, Saben ngan suku de' ca da. Un tepe Datun Julut ja doai ale' ja nai lua' kaeng ilu kelonan. Ja udip dalau du ka' Apau Kayan sekitar penghujung 1800an re ja baen dau de' lata'.

Juko' naki, kanjet lasan ji ilu ti e, cuma untuk mete' kebudayaan ngan ca kebangen bagi ilu lepo, ngan bangsa le. Jadi ilu sebagai penyambung generasi le Kenyah, harus le ala' masa merenung masa depan kebudayaan le, ala' masa pekalai kanjet, oyan pekian kebudayaan milu boka nta meli pe kedu. Singket osa ilu sebagai Kenyah harus un sekurang-kurang 2 atau 3 gelam Kebudayaan le. Mesti tai un dalau Lepo' atau Kebana menganjur Pesta Kebudayaan.

Tega Tawai
Amaitebun 15.07.2010